ബ്രെയിന്‍ സ്റ്റോമിംഗ്

എ.സി.ശ്രീഹരി 

പുതിയ കവികളെ കണ്ടിട്ടുണ്ടോ എന്തോ

എന്തുമാത്രം ആകാംഷയാണ് ആ മുഖങ്ങളില്‍

എത്ര വേണമെങ്കിലും പ്രശംസിച്ചോളൂ

ഒട്ടും പൊങ്ങില്ല

പൊങ്ങുതടിപോലെ കിടക്കും

പൊങ്ങച്ചചന്തകളില്‍ .

പുതിയ നിരൂപകരെ കേട്ടിട്ടുണ്ടോ ആവോ

എന്തുമാത്രം ആധികാരികതയാണ് ആമുഖങ്ങളില്‍

മൂക്കും മുലയും മുറിക്കും

മുക്കും മൂലയും തപ്പും

ഒറ്റവരി പോലും മാറ്റാന്‍ പറ്റില്ല

വരിയുടഞ്ഞുപോം.

പുതിയ വായനക്കാരെ പറഞ്ഞിട്ടുണ്ടോ കാര്യം

എന്തുമാത്രം ആത്മാര്‍ഥമാണ്  ആ വേഴ്ചകളില്‍

ഒട്ടും വിട്ടുവീഴ്ചയില്ല

ചേര്‍ത്ത് വെച്ച് ഉത്പാദിപ്പിച്ചോളും 

അവസാനത്തെ അര്‍ഥം.