ഉറങ്ങാത്ത ഉറക്കം

വി.എം.ഗിരിജ 

നീ പറ

എന്റെ ഉറക്കം അവിടെ എത്തിയില്ലെ?

ചുറ്റി വരിയുന്ന പാമ്പേ

ആടിക്കളിക്കുന്ന കാലേ

തേൻ വിളയുന്ന ചുണ്ടേ…..

എന്റെ ഉറക്കം എവിടേയും എത്തിയില്ലേ?

നീയുറങ്ങിയാൽ നിന്റെ മുഖം നോക്കി

പോയിരിപ്പത്

നീ

ഉറക്കത്തിന്റെ  വാതിൽ

മെല്ലെ തുറന്നടയുമ്പോൾ

കാണുമാറുണ്ടോ?

നിന്റെ വിരലിൽ

നാളെ നോക്കണം

നീൾമുടി നരനാരുകൾ

നേരിയ നിലാവിൻ മയം

മുന്തിരി പോലമർന്ന

മുലക്കണ്ണ്…..

ചുണ്ടിന്റെ ചായം….

എന്തെങ്കിലുമുണ്ടോന്ന്!

ഉറക്കത്തിനു

നീ പറഞ്ഞു കൊടുക്കുമോ

ഈ വഴി?

അത് മറന്നോരു വഴി?